काठमाडौं, २९ पुस (ओएनएस) : संविधानसभामा समलिंगी तेश्रोलिंगीको अनिवार्य प्रतिनिधित्व सुनिश्चित गराउन नील हिरा समाजले राजनीतिक दलहरुलाई आग्रह गरेको छ ।
समाजकी अध्यक्ष पिंकी गुरुङ नेतृत्वको टोलीले नेकपा एमालेका सचिव विष्णु पौडेललाई भेटेर मन्त्रीपरिषद्ले मनोनित गर्ने २६ जनामा समलिंगी तेश्रोलिंगीको पनि प्रतिनिधित्व सुनिश्चित गराउन माग गरेको हो ।
ध्यानाकर्षण पत्र बुझाउँदै अध्यक्ष गुरुङले संविधानमा यौनिक तथा लैगिंक अल्पसंख्यक समूदायको अधिकार लेख्न समलिंगी तेश्रोलिंगीकै प्रतिनिधित्व हुनुपर्ने बताए ।
एमालेले समलिंगी तेश्रोलिंगीको अधिकार सुनिश्चित गराउन पहल गर्ने आशाले पार्टी प्रवेश गरेका समलिंगी तेश्रोलिंगीलाई अव फेरी निराश नबनाउन गुरुङले आग्रह गरे ।
नेकपा एमालेले भदौ १७ गते पार्टी प्रवेश गराउँदा समलिंगी तेश्रोलिंगी मध्ये ३ देखि ५ जनालाई समानुपातिकको सूचिमा राख्ने आश्वासन दिएको थियो । समानुपातिमा राख्ने भनेर आश्वासन दिएको एमाले अहिले समलिंगी तेश्रोलिंगीको अधिकार प्राप्तीको अभियानमा मौन बसेकोमा दुख लागेको गुरुङले बताए ।
अध्यक्ष गुरुङले संविधान सभामा समलिंगी तेश्रोलिंगीलाई अनिवार्य प्रतिनिधित्व गराउन गंम्भिर भएर लाग्न आग्रह समेत गरे ।
विघठित संविधान सभामा समलिंगी तेश्रोलिंगीको प्रतिनिधित्व सुनिलवावु पन्तले गर्नु भएको थियो । मौलिक अधिकार तथा निर्देशक सिद्धान्त समितिको मस्यौदामा समलिंगी तेश्रोलिंगीको अधिकार विवादरहित लेखिएको थियो । तर संविधान लेख्नकै लागि दोश्रो पटक गठन हुन लागेको संविधान सभामा एक जना पनि समलिंगी तेश्रोलिंगीको प्रतिनिधित्व भएको छैन । एमाले सचिव विष्णु पौडेलले समलिंगी तेश्रोलिंगीलाई संविधान सभामा प्रतिनिधित्व गराउने विषयमा पार्टीमा छलफल गर्ने बताए ।
समाजले नेपाली काँग्रेस, एकीकृत नेकपा माओवादी, राप्रपा नेपाल, राप्रपा लगायतका संविधान सभामा प्रतिनिधित्व गर्ने दलका शिर्ष नेताहरुलाई भेटेर अनिवार्य प्रतिनिधित्व गराउन माग गर्ने जनाएको छ । स्रोत : onsnews