१५ फागुन, काठमाडौं । नेपाली क्रिकेट टोली बंगलादेशमा हुने ट्वान्टी-२० विश्वकप क्रिकेटको तयारीमा छ । विश्वकप खेल्ने नेपाली टोलीको सदस्यहरुको जीवनका महत्वपूर्ण क्षणहरुलाई समेटेर पत्रकार जगदिश्वर पाण्डेले तयार पारेको पुस्तक ‘विश्वकप ट्वान्टी-२० क्रिकेटका सारथिहरु’ सार्वजनिक गरिएको छ । बिहीबार राजधानीमा भएको कार्यक्रममा प्रशिक्षक र विश्वकप खेल्ने टोलीका सदस्यहरुले संयुक्त रुपमा पुस्तक विमोचन गरे । कार्यक्रममा महानायक राजेश हमाल, तेक्वान्दो खेलाडी दीपक विष्ट, नायिका निशा अधिकारी लगायतले शुभकामना दिएका छन् । कार्यक्रममा नेपाली टोलीका कप्तान पारस खड्काले विश्वकप खेल्नु आफूहरुको सपना भएको बताए ।
विश्वकप खेल्नुपर्छ भन्ने भएपनि कहिले र कसरी भन्ने थाहा नभएको भन्दै उनले भने-इच्छा थियो तर, बाटो थाहा थिएन । प्रशिक्षक पुवुद्धु दशानायकेले बाटो देखाइदिनुभयो ।’ विगतमा अभ्यासका लागि भारत जाने क्रममा अध्यागमनका कर्मचारीहरुले नेपालमा पनि क्रिकेट छ भन्ने गरेको सम्झँदै पारसले भने-’अध्यागमनमा कर्मचारीहरुले क्या नेपालका भि क्रिकेट टिम हे भन्थे । त्यसबेला एकदिन तिमीहरुलाई देखाउँछौं’ भन्ने इख थियो ।’ पारसले अब नेपालले खेलेको विश्वकप भारतकै स्टार स्पोट्र्सले देखाउँदा भन्दा हल तालीले गडडाएको थियो ।
क्रिकेटले देशलाई एकताबद्ध पार्न सक्ने भन्दै उनले सबै नेपालीको मुहारमा खुसी ल्याउनु नै ठूलो भएको बताए । दबावमा खेल्नु आफूहरुको जीवनको एक अंग भइसकेको उनले बताए । खेलाडीहरुको अटोग्राफ रहेको पुस्तकको मुल्य १२०० राखिएको छ, जसको विक्रीको ७० प्रतिशत खेलाडीलाई दिइनेछ । यस्तै सामान्य पुस्तकको मूल्य ४ सय ९९ राखिएको छ र यसको विक्रीको २० प्रतिशत खेलाडीलाई दिइनेछ । कार्यक्रममा प्रकाशकले खेलाडीहरुलाई संयुक्त रुपमा १ लाखको चेक समेत प्रदान गरेको छ
