डढेल्धुरा, मंसिर १६ । डढेल्धुरामा भएको सवारी दुर्घटनामा परी ज्यान गुमाउनेको संख्या ११ पुगेको छ । बाजुराबाट धनगढी जाँदै गरेको ना ५ ख ७८९ नम्बरको बस डडेलधुराको मेलखर्कमा दुर्घटना हुँदा ज्यान गुमाएका मध्ये लक्षीराम थापाको मात्र परिचय खुलेको छ ।
बाँकीको परिचय खुल्न नसकेको प्रहरीले जनाएको छ । दुर्घटनामा ९ पुरूष र २ महिलाको ज्यान गएको छ । दुर्घटनामा परी ३४ यात्रु घाइते भएका छन् । जसमध्ये ९ जनाको अवस्था गम्भीर रहेको छ । घाइते मध्ये केहिको परिचय खुलेको छ । जसमा बाजुराको वाधु गाविस वडा नं ६ का राजवहादुर खत्री, बाधु ७ कै ३८ वर्षका सब्वल लुहार, ५२ वर्षका विरु अधिकारी १४ बर्षका भक्त सार्की, बाधु ७ कै १७ वर्षका दिनेश अधिकारी, ३५ वर्षका धनु सार्की, ४८ बर्षका गौरी रावल छन् ।
यस्तै गोत्री ७ का २० वर्षका जयमान दमाइ २१ बर्षका उज्वल दमाइ वडा नं ८ का ६० बर्षका अर्जुन वड, वडा नं ७ का ३३ वर्षका चिने दमाइ, मुगु भैरवस्थान गाविस वडा नं ३ का १६ वर्षका कर्मराज जैसी, सोहि गाविस वडा नं ६ का २९ वर्षका कर्ण सार्की, मानवहादुर सार्की मुगु धैना ५ का अमृत सार्की मार्तडीका १९ वर्षका झरना खडका, १९ वर्षका राजन खडका, ८ वर्षका प्रमिला पण्डित घाइते भएको प्रहरीले जनाएको छ । त्यसैगरी २१ वर्षका प्रेमराज पण्डित, ६० वर्षका कृष्णराज पण्डित, २१ वर्षका निरा पण्डित, ३५ वर्षका धुनदेवि पण्डित मार्तडी सातका विनोद विक, पाण्डुसैन २ का २१ वर्षका गोर्ख कडारा, डोटी गजरा दुईका अमर कुवर, बाजुरा कैलाशमाण्डौ ८ का २० वर्षका खडक थापा, पाण्डुसैन २ का १८ वर्षका चिने कडारा मुगु धैना गाविससका कर्णजित सार्की र कन्चनपुर ७ का गणेश वडु रहेका छन् ।
सामान्य घाइतेहरुको डढेल्धुरा सामुादयिक अस्पताल र गम्भिर घाइतेको धनगढी अस्पतालमा उपचार भइरहेको छ । डढेल्धुराका प्रमुख जिल्ला अधिकारी सागरमणि पराजुली दुर्घटनाका बारेमा भन्नुभयो-’बाजुराबाट धनगढी हिँडेको बस हो । सुरुमा ३० जना यात्रुको इन्टि्र गरिएको पाइएको छ, केहीलाई पछि बाटोमा पनि थपिएको जानकारी आएको छ ।
बिहान पौने ५ बजेतिर दुर्घटना भएको र गाडी सडकबाट २/३ सय मिटर तल खसेको छ । नेपाल प्रहरी, नेपाली सेना र स्थानीयबासीले दुर्घटना भएको खबर पाए लगत्तै उद्दार गरेका छन् ।’ यता उद्दार कार्यमा रहेका सुरक्षाकर्मीले भने सवारी चालक निदाएका कारण दुर्घटना भएको हुनसक्ने बताएका छन् ।सजिलो ठाउँमा दुर्घटना भएकाले यात्रुको चाप बढी हुनु र चालक निदाउनु दुर्घटनाको कारण हुनसक्ने उनीहरुको अनुमान रहेको छ ।